Aizawl Municipal Corporation (AMC) chuan nimin khan AMC Conference Hall-ah AMC councillor-te pualin Swachh Bharat Mission (Urban) zir chhianna an buatsaih. AMC Mayor Pu Lalrinenga Sailo chuan, AMC Building Regulation khauh zawka kalpui a nih dawn thu a sawi.

Sensitization Programme on SBM (U) for Councillors hi AMC Commissioner Pu Zothanmawia'n a kaihruai a; Mayor Pu Lalrinenga Sailo chuan, August 29, 2022-a AMC Executive Council thutlukna angin, AMC Building Regulation khauh zawka kalpui a nih tur thu sawiin, "Dan zâwm lote hremna, pawisa chawitir pawh a lêt sàwma tihpun a ni dawn. AMC dan zâwm lote chu dan angin maximum penalty, lung-in tàn thlenga hrem an ni ang," a ti.

Mayor chuan, hun kal tawhah in sak phalna pek ang ni loa in satute chu pawisa chawitir hnuah phalna pek chhunzawm a lo ni tawh ṭhin a nih pawhin, tun aṭang chuan hremnain phalna pêkah awmzia a neih tawh dawn loh thu sawiin, "Penalty hi ngaihdamna a ni tawh lo ang," a ti a; ṭhangtharte chênna tlaka Aizawl khawpui siam a nih theih nan a enkawlnaah thawkho zel turin councillor-te a sáwm.

Zirhonaah hian UDPA Joint Director Pu Malsawmzuala leh Deputy Director(Hqrs) Pi Lalhruaitluangi ten SBM chungchanga hriat tur pawimawhte an sawifiah a ni.